पुणे, २८ जून: विधान परिषदेच्या १२ जुलै रोजी होणाऱ्या निवडणुकीच्या पार्श्वभूमीवर राष्ट्रवादी काँग्रेसच्या पुणे शाखेने (अजित पवार गट) शहरासाठी एका जागेची मागणी केली आहे. शहराध्यक्ष दीपक मानकर यांच्या नेतृत्वाखाली शिष्टमंडळाने मुंबईत उपमुख्यमंत्री अजित पवार यांची भेट घेऊन ही मागणी केली.
येत्या ऑक्टोबरमध्ये होणाऱ्या विधानसभा निवडणुकीसाठी पक्षाची स्थिती भक्कम करण्यासाठी विधान परिषदेची जागा मिळविण्यावर मानकर यांनी भर दिला. पुण्यातील आठ विधानसभा जागांपैकी दोन जागा राष्ट्रवादीच्या ताब्यात असून नुकत्याच झालेल्या लोकसभा निवडणुकीच्या निकालामुळे जागावाटपाबाबत कार्यकर्त्यांमध्ये चिंतेचे वातावरण निर्माण झाले आहे.
इतर पक्षांशी वाटाघाटी करताना राजकीय फायद्यासाठी विधान परिषदेच्या उपलब्ध ११ जागांपैकी एक जागा मिळविणे महत्त्वाचे असल्याचे स्थानिक पदाधिकाऱ्यांचे म्हणणे आहे. (Pune News) निवड झाल्यास ही भूमिका स्वीकारण्याची तयारी मानकर यांनी व्यक्त केली, मात्र अंतिम निर्णय पक्षाच्या वरिष्ठ नेतृत्वाचा असल्याचे त्यांनी नमूद केले.
भारतीय निवडणूक आयोगाने १२ जुलै रोजी विधान परिषदेची निवडणूक जाहीर केली असून उमेदवारी अर्ज भरण्याची प्रक्रिया सुरू आहे. उमेदवारी अर्ज दाखल करण्याची शेवटची तारीख २ जुलै असून माघार घेण्याची मुदत ५ जुलै आहे